来源：未知 时间：2014-11-24 10:30 作者： admin 点击：次

今日頭場有澳職榜尾大戰，由西悉尼流浪者主場對紐卡素噴射機。開咗季咁耐，踢到依家第7輪，呢兩隊都仲未贏過。今次兩隊魚腩碰頭，彼此都認為對方係弱隊，為求打開勝利之門，一定會搏到盡！噴射機依家傷兵滿營，就算西悉尼流浪者近排要應付唔同戰線，成隊波「攰乃乃」，1.7倍主W都應該捧！

（有線64及203周六下午2:00直播）

西悉尼流浪者今季喺聯賽嘅表現真係曳到飛起，可能因為佢哋同時要應付亞冠盃同澳職兩條戰線有關。其實以佢哋嘅人腳，又點會喺聯賽踢得咁差先得o架！流浪者喺亞冠盃就一直過關斬將，可能因為咁，無時間分心去應付咁多比賽啩！佢哋上星期同周中都要比賽，教練已經以輪換方式去等啲球員回吓氣，避免過勞。不過，連環咁唔停踢，講真就算鐵人係咁換法都唔掂，所以呢場未必可以最佳狀態迎戰噴射機。

噴射機傷兵滿營
不過，噴射機嘅情況仲慘過西悉尼，佢哋傷兵一籮籮，中場祖舒巴里斯、米治谷巴等等都唔出得。況且月初對住勁旅墨爾本勝利嗰場，喺領先兩球之下，捉到鹿都唔識脫角，畀對手追番兩球，逼和2:2，想贏番場振奮吓士氣都唔得！睇嚟呢場都唔會有咩好轉o架嘞，都係信西悉尼可以開齋好過。

頂「占」推介：西悉尼流浪者（主勝）